T’ei Mi Ke Beba (Pero tòg no?)


Manera hopi hóben adulto (anto mi ta uza e palabra adulto hopi ‘losjes’ aki nan) ma yega un etapa den mi bida kaminda mi tabata sinti ku mi tabata KLA ku Kòrsou. “No mama, ni UNA ni UDC no tin niun studie ku ta pas ku mi.” Bo por bisa mi tabata den un relashon kaminda mi tabata simplemente ‘falling out of love’ ku Curadise. Pa ami tabata ora pa un amor nobo, den mi arogansia di adolesente pèrdi ma bai buska e ‘greener grass on the other side’. Naturalmente esei a kaba ku ami bon lorá den jas manera un ayaka pa 8 luna largu paso Hulanda tabata ‘the one’.

Komo ‘beursalen’ e ta un eksperiensa i sintimentu ku bo no por skapa for di dje. Bo ta sali Kòrsou, konsiente ku bo stima bo isla pero ku ela pèrde su enkanto i ku e sintimentu ku bo tin ku bai for di kas pa por desaroya. Pero ora bo yega e otro banda, atabo ta pensa ku porta ba komete un fayo. Ku porta ta bèrdat ora nan bisa ku ‘grass ain’t that green on the other side’. Anto einan bo ta drenta un siklo di ‘fall in and out of love’ ku Kòrsou manera kualke adolesente ku nan prome ‘èks’.

Picture Blog 1

E etapa ku ta sigui ta esun kaminda bo ta namora bèk ku Kòrsou despues di un buelo di 11 ora, 8 mil kilometer di distansha, temperatura nan di 5 grado i e famoso ‘Dutch humor’. N’e momento ku bo no ta biba ei mas, e orei Kòrsou ta kuminsa mustra manera paraiso bèk. “Amiga, belasting a yega serka bo tambe? Ta dikon nos a bin beba aki atrobe?”.

Naturalmente, ora k’e laman ta mustra mas blou i e kalor diripiente no ta zona insoportabel mas, ta kuminsa plania pa bai bèk maske ta ku vòngkònsi. Atabo awor sinta mei mei college ta wak preis di ticket “Saka 1000 euro pa dos siman so ta muchu si, si mi no bai lès pa un siman no ta nada tòg?” anto maleta ta kla tres siman prome ke biahe, lubidando ku ainda un kuminsa siña p’e tentamen di otro siman.

Picture Blog 2
bron; keepcalm-o-matic.co.uk

Anto ta aki nan, e di tres etapa ta kuminsa. Despues di hopi luna ta anhela i buta throwbèk riba Instagram ku #takemeback atabo bèk riba nos dushi isla. Yená ku fantasia di e vòngkònsi perfekto i e kolo ku bo mester haña bèk bo ta embarka riba e mishon pa namora bèk ku Kòrsou. Pero tiki tiki bo ta kuminsa realisa ku esei ta un tiki mas difisil ku ba sinta magina ora bo tabata den e friu aya. Diripiente bo ta wòrdu konfronta ku punto menos bon di nos isla ku bo no a kai ariba ora bo tabata afo. “Un boter di Nutela pa 10 florin? Na Hulanda ku 5 euro ma kumpra 2!”. Ora bo ta kara pa kara ku e infrastruktura ku ta laga di desea riba nos isla, kriminalidat ku ta reina i preisnan ku ta subi so, ta n’e momento ei tur fantasia ta kai na awa. Anto esaki ta bira e momento krusial, kaminda bo ta realisá ku bo tin dos opshon i ku bo por skohe entre dos persona.

Bo por ta e persona ku ta wak tur esei i ta keda bisa “Kòrsou ta pa vòngkònsi so ami por bai”. Òf bo por atmira i apresia Kòrsou manera e ta, ku tur fayo i problema anto kuminsa e proseso kaminda bo ta bira e persona ku ta kai stima na un nivel mas sinsero ku nos isla. Un nivel kaminda bo sa ku por mihó i bo ta kompromete na yuda nos isla bai dilanti konsiente ku lo tuma tempu i ku den e tempu ei Kòrsou mester di amor inkondishonal pa yega kaminda e meresé di ta.

 

Picture Blog 3
bron: Wallsneedlove.com

Guestblogger Chelsy Gomez