Apresiabel sosiedat, e ta bon asina!


Despues di hopi luna sin mira mi ruman, nos tur tabata sintá na kas di nos mama. Ñetunan ta kore bai bin i a disidí di kuminsá ku un wega di gritamentu. Mientras nos ta kòmbersá, e gritamentu ta bira mas strukturá i duru,  te ku el a kuminsá zona manera un ritmo deskonosí i niun tiki agradabel. Den esei, imitando un bon hulandes europeo, m’a disidí di para e müzik i fiesta ku mi no tabata invitá na dje.

Mi ruman a bisa mi: “ta kon bo ta hasi dia bo tin di bo mes”?, referiendo na un yu. “Anto den tur esei ta kiko bo ta warda”? Nèt e tòpiko ku mi no tabata ke a kai manera un skalchi di pastechi riba mesa. Komentarionan a kuminsá, analisis amplio di mi bida romantiko skars. Teorianan di kua ta motibu ku segun nan, mi ta pará riba un baranka chikí den awa i ‘kon e mester ta’.

Ok, stòp! E ta bon asina! Dikon sosiedat ta pensa ku tin algu robes ku un hende ku pa su edat ainda no a hasi of logra sierto kosnan? Dikon ta yega asina leu ku un sosiedat ke definí ‘kon e mester ta’ i kondená tur otro kos ku no ta pas den e definishon ei? 2017 ta kabando i ainda tin hende ta kere ku unabes bo a kaba skol, bon diploma, trabou, bo mester tin un pareha i koroná e obra ku yu. Wel, sosiedat a para ketu pensa kiko e hende mes ke, kua ta e motibunan ku e no a logra tal kos? Of djis mester ekskluí e hende aki pasó e no sa ‘kon e mester ta’? No solamente e puntonan ku mi a menshoná promé, pero tambe e aparensia ideal, e kurpa perfekto, e material, i asina mi por sigui menshoná. Nos tin e kustumber di biba pa hende, kreando e aparensia aseptabel of lokual supeustamente e mayoria ta konsiderá korekto, riba aspektonan ku no ta di importansia.

Konstantemente nos ta keda bombardeá ku tur tipo di informashon di ‘kon e mester ta’. Awendia ku medionan sosial, esaki a bira pihó. Kada bes un ‘kon e mester ta’ nobo ta brui i nos ta selebrá esaki den tur su gloria i asta tin bia den su mediokresia. Pero tiki bia nos ta selebrá individualidat i originalidat.

Bo a yega di pensa un ratu kiko ta bo fuente di felisidat? Kiko ta hasi abo felis di berdat? Tur loke sosiedat ta eksigí di bo, e ta hasi bo felis di bèrdat?

Ami ta skohe pa mi ta felis na promé lugá, konsenshi trankil i disfrutá di kada oportunidat ku bida trese pa’mi. Traha riba un fundeshi sólido pa mi mes. No ta egoista mi ta, pero mi ta kere si ku ami mester ta fuerte pa asina mi por ta un sosten pa e otronan rondó di mi. ‘I cannot pour from an empty cup’. Esaki ta hasi mi un persona debil of mas bien humano den bo bista? Mi a realisá ku hopi hende no ta komprondé ni dominá e arte di disfrutá i ta felis di bèrdat, pero si biba pa komplasé otronan.

Mi ta kere ku kada kos tin su tempu i no ta na nodi pa hansha òf preokupá. E kosnan ei ta skaf for di bo bida. Kada hende ta disidí pa nan bida ‘kon e mester ta’i kiko nan ta skohe. Para bo so na e banda “robes” of kana den e grupo grandi den e banda “drechi”.

Guestblog Nayseline Jamanica

Advertenties

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s