Hasi koi bon Yu di Korsou

Ami ta un bon yu di Kòrsou, mi ta lanta tur mainta gradisí e Kreador. Mi ta pidié guia mi pa ta un bon yu di Kòrsou.Mi ke ta komprensibel sinsero i honesto un bon trahadó ku mas amor pa mi próhimo.

Esaki ta algun letranan di e jingle “e bon yu di Kòrsou”  un kampaña ku a start na un planta di televishon i ku tur aña di nobo a sigui krese. Manera nos sa na Kòrsou e programa a haña su elogio pero tambe su kritiká nan.Ami ta kompletamente di akuerdo ku e kampaña aki … esaki te motibunan.

Kuminsando na e nominashon “Yu di Kòrsou” .

maxresdefault2

Mi ta yu di mi mama.

Esaki ta loke bo ta tende basta hende ta komentá, ku e nominashon korekto ta Kurasoleño i no Yu di Kòrsou. Mi ta yu di mi mama i mi ta Kurasoleño…….

Si anto ?

Pakiko nos mester kita algu ku ta úniko di nos . Tin diferente pais ku tin diferente nominashon pa nan mes. Na Trinidat por ehèmpel e habitantenan ta bisa ku nan ta “Trini till the bone” , Filipinonan tin “Pinoy” ku ta nifika Filipino den nan idioma. Na Bahamas nan ta usa Bajan. Tur ta nominashon nan ku ta duna nan mes den kual nan ta ekspresá nan sentido di orguyo di ta nase na e dicho Pais. Awor e “Yu di Kòrsou” ta loke ta hasi nos úniko pakiko nos lo tin ku kambia pa algu standart?

 

Ta un mihó persona.

Un otro punto ku mi ta haña ta hasi e kampaña aki tremendo ta e echo ku e ta bai pa bo ta un mihó persona. Sea bo a nase of bo a bin biba aki e no ta kita nada pa bo ta un bon hende, esei ta loke e kampaña aki ta propaganda.

Tin diferente manera pa bo ta un mihó persona, un mihó Yu di Kòrsou.

Yama bon dia , pone un smail riba bo kara ora bo ta atendé ku otro , no papia riba otro , elogiá otro su trabou en bes di kritiká negativa mente tur esfuerso.

Ta respetuoso i tolerabel pa ku otro. Ba yega na un Chines yame mener of señora no tin nodi bisé Hey Chino! Si e persona banda bo su religion ta diferente òf ta kreyente sera bo boka i respetá! No tin nodi bisa ku su kaminda spiritual ta malu. Na final nos tur ta bai mes kaminda. Bou di tera.

Respetá kada ken su eskoho seksual, yama otro M#riku ku Machoro no ta yuda ku nada. Ku ta e sekso ei e la stima i ta hasi e felis lagá e biba su bida trankil.

image

Lanta bo bai traha!

Tur pais na mundu tin nan kontratempu i retonan ku e tin ku dil ku ne. Bo a nase aki e pais ta di bo tambe. Ta bo deber pa por kumpli ku bo pais i nos tur mester di otro. Bo no por sinta man krusa i spera ku bo saku lo yena kaba pa bo por kritiká Gobièrnu, Schotte i asta bo Dios ku ta nan falta ku kos ta malu pa bo. Si no tin un kaminda, krea bo propio kaminda.

Fe sin obra ta morto!

I por último konosé bo Himno i balorá loke ta di bo. 

Bo konosé himno Merikano for di bo kabes, Bo por kanta “Gloria al bravo pueblo” mihó ku kualke Venezolano. Pero bo himno nashonal mes bo no sa tur kuplèt?

Buska un manera di sa esaki. Tin hopi palabra den e himno aki ku si nos reflekshoná riba dje por yuda nos pensa riba nos propósito riba e pida baranka aki. Bo skucha ku atenshon lo bo ripara ku nos himno ta papia di netamente di e forsa i balor nesesario pa nos por traha duru pa yuda Kòrsou bai dilanti.

Nos mester realisá ku nos ta a fortuna di por biba riba un Isla asina dushi i ku nos tin tur kos na nos alkanse pa por hiba e isla aki bai dilanti.

Kuminsando na nos propio sentido di nashonalismo i nos komportashon komo un Bon Yu di Kòrsou.

Felis dia di bandera!

maxresdefault

 

 

 

 

 

Advertenties

Ta e, no Ta ami!

No t’ami, t’ami un te, ta e no ta ami. No t’ami a hasi e ta e no t’ami. E kantika aki di Angelitos ta un kantika ku ma tende dia den dia fo durante mi hubentut. Un kantika ku tabata konta tokante e prinsipio di papia bèrdat i no skonde tras di mentira.

Ironia ta ku e palabranan aki awendia a haña un balor a un mas fuerte den komunidat. Nos a krea e idea ku nos bida semper ta perfekto i nada no ta pasa ku nos i nos famia. Na e  momento ku algu pasa mes nos ta ignorá òf purba laba man foi dje . Ma disidí di yama esaki  e síndrome di Pilato.  Pa refreská boso memoria, Ponsio Pilato tabata e gobernador ku a laba su man komo símbolo ku e  NO para responsabel pa e ehekushon di Kristu.

Image result for washing hands

Serka nos esaki a bira masha normal.

Nos ta defendé nos yu ora e faya i ta bai tira falta riba tur hende ku eksepshon di nos propio manera di eduká. Nos ta kla pa bai bati yùfrou ku begeleider ku ta hasi nan esfuerso tur dia di nobo pa dil ku nos yu. Pero nos no ta tuma niun esfuerso di bai kòmbersá ku yùfrou pa tuma su rapòrt i wak kon ta bayendo ku su edukashon.

Nos ta defendé persona nan altu den komunidat ku faya ku lei. Bisando ku ta humano nan ta i no por husga nan. Palu lo hala ku nos, nos lo rabia i sulfurá. Ora elekshon dal aden ku partimentu di kos start. Ta pa nan mes nos ta vota.

Nos ta hari i gosa ora tin “beef” riba Internet. Nos ta share nos ta instigá nos purba hinka esun den barika di otro i krea broyo. Ne momento ku beef bai kaya i hende muri i asesinato tuma lugá. Nos ta subi e mes un Internet ke yora sklama i puntra unda Korsou ta bayendo.

Nos ta kla pa mustra dede riba tur estranhero riba e pida baranka aki si algu bai robes. Pero ne momento ku un di nos tin e mes un aktitut nos ta tapa wowo hasi manera nos no a mira net net nada.

Nos a koba mama di jen kompania aki. Maldishoná nan i bisa mare nan por sera. Na momentu ku e kompania a manda trahadó kas of dal porta sera. Ta nos mes ka bati nan i yama nan sinbèrgwensa. Nos mes ke koba mama dje kompania i ke sali defendé e trahadó.

Estupides riba e lugá aki ta sorprendé mi mas i mas. Meskos ku ma lanta skucha e kantika aki di Angelitos dia den dia fo. Mi ta realisá ku dia den dia fo nos ignoransia a keda meskos. Nunka nos no ta pone un spil dilanti nos kara i realisá ku ne momento ku nos skohe pa no denunsia kos malu nos tambe ta parti di e problema.

Mi ta kere a yega ora pa nos ban kuminsá para ketu riba nos aktitut. Habri nos wowo i ban kuminsá hasi e kambio. Ban pensa den solushon.

  • Kuminsa sinta tur atardi maske ta 15 minut i papia kubo yu, puntra kon a bai embes di pròp e ku tablet kaba mande kama. Bai skol i puntra e maestro pa su komportashon. Ba bai hiba e su deporte of aktividat faborito keda ei bo wak e hasi su kos. E lugá nan aki no ta un “opvang”.
  • Ku e parlamentario of persona haltu a faya, rasoná pa bo mes promé bo husga. No laga promesa falsu hasi nos siegu. Kada bes bo hasi kos di ignorante vota pa nan, bo ta duna nan derecho pa tuma bo hasi.
  • Ba mira e persona start beef riba Internet, wak e sigi bai. No bai duna atenshon. No bai lanta broyo. Paso indirektamente bo tambe ta kulpabel.
  • E estranhero den mayoria kaso ta bini Korsou pa un miho porvernir.  Duna un chèns i basta di kritiká paso e tambe ta traha duru pe bai dilanti.
  • Ku kos ta bai malu ku un kompania, no ta tur bia te trahadó su falta. aunke kon rabia nos por ta. Nos mester tene kuenta ku e trahadónan dje kompania tambe ta hasi nan best.

 

Ban purba di kibra ke sirkulo visioso I stòp di ta ignorante pa ku loke ta pasa riba e lugá aki.

Related image

 

 

 

 

 

 

 

 

 

 

Bo lugá ta sigurá

Mi por ta un bon hende sin mester ta religioso?

Un pregunta ku pa largu tempu tabata biba den mi i ku tabata pone mi sinti hopi inkonfortabel. Batisá na baby komo katóliko, manera mayoria di nos na Kòrsou, mi no ta tin e derecho di skohe mi kaminda spiritual. Tempu ku mi ta tin 5 aña mi mayornan a “kombertí” i a afiliá na un misa “Kristian”, aki tambe naturalmente mi no ta tin un eskoho i mi tabata bai misa ku nan fielmente. Den banda di e misa mihó konosí komo sirbishi, nos tabata bai zondag school, misa djamars, hubentut i misa djabièrnè. 

Den e periodo aki mi a siña masha hopi mes, mi tabata konosé tur versíkulo di beibel, tur e kuenta nan maravioso i tambe kon mi mester tabata un bon Kristian. Mi mayornan no tabata huma, bebe, ni gamble. Nos no tabata papia palabra malu i tur kaminda ku bo topa un “ruman” en bes di kumindá, bo ta bisé “bindishon”. E tabata sinti manera paraiso.


Source:Bmoorevisuals.com

Den e misa nan aki den banda di e hermandat tin un herarkia. Bo ta kuminsá komo un simpel baidó di misa i bo por a terminá te na lider, ko pastor i den sierto kasonan asta pastor! Tur esaki tabata dependé di diferente faktor. Inkluso bo kontribushon na e misa (lesa diesmo). Mientras ku bo kumpli i no ta kuestioná mandato tur kos ta ok. Manera bo kuestioná sierto kos, e pedestal kubo ta ariba lo ser kòrta i bo ta kita kai bragadam. Mayoria bia pa bèrgwensa bo ta bai for di ei nan. Hopi Kristian no ta opta pa laga misa pa semper pasobra nan mente a ser kondishoná.Tur otro kos ku no ta Kristian ta malu i ta di satanas i outomatikamente bo ta bai un otro iglesia i asina e kuenta ta sigui bai.

Den mi kaso, mi mayornan ku a dediká nan bida i finansa na e iglesia a ser pone un banda pa e mes un persona nan aki. Naturalmente desepshon a reina i nos a bai un otro iglesia. Aki meskos a sosodé, mi tata a bira lombra pa misa i mi mama a bai misa Katóliko bek. Den tur e proseso aki mi tambe tabata bai mee ja ku mi no tabata sa miho. Pero mi tatin mi pregunta nan…

Na e momento ku nos a bolbe bek na misa Katóliko mi a sinti mi bon i mi a kuminsá partisipá na tur aktividat. A yega asina leu ku awor si mi por a skohe i a skohe pa keda ei. Aki ma siña hopi i tambe a subi den e herarkia sin ta sa. Mi a haña hopi amigu i tambe a krea amistatnan ku te awe mi tin. Mi a tuma e desishon pa kasa na misa tambe.

Na final mi a skohe tòg di a bira lomba kasi kompleto pa iglesia aunke ku mi ta kere fielmente den un ser mas grandi ku nos. Ku aña mi a bin komprendé ku tur religion ta basa riba e mes un prinsipio:

Stima otro, meskos ku bo mes!

Ne momento ku bo skohe pa stima, di bo mes bo ta kumpli ku tur otro kosnan ku ta bon komo humano. E ta zona fásil tòg?  

Pero den praktiká nos komo humano sin distinguí religion a skohe pa hasi otro. Nos a bai guera pa religion, nos a usa religion pa hustifiká sklabitut, nos a tortura i mata esnan ku no tabata pensa meskos ku nos. Hopi mucha a sufri abusu seksual i emoshonal na man di lidernan religioso. Hopi iglesia a probechá i lanta imperionan finansiero super grandi riba lomba di nan siguidónan. I pa pone chèri riba e bolo asta algun kreyente ta bin pidi pordon i hasi misa ku 5 religioso despues di kometé akto violento den parlamento i asina mi por sigui.

Image result for anti church meme

source: know your meme.

Ku ta pone mi bin bek na e punto… Mi mester ta religioso pa mi ta un bon hende?

Mi sa haña e pregunta hopi bia “Dikon mi a desvia for di e kaminda?” Kua kaminda pa ser eksakto?. Mi no a desviá, mi ta sinti ku ta awor mi a haña mi kaminda.  Mi ta preferá di no ta religioso ta humano i stima mi próhimo, ku pretendé di ta religioso i trata mi próhimo malu den nòmber di Dios.


I si pa hopi kreyente pa e motibu ku mi no ta religioso aunke mi ta un bon hende mi ta bai fièrnu…. Mi ta bèl diabel bisé drecha mi stul numa.

Felis kuaresma.

Amèn.

 

 

 

Mane den SUBT

Temporada di Karnaval a hasi su entrada i manera semper e ta un temporada ku ta bini ku hopi alegria. Nos ta sera nos sen pa bai festival di tumba, traha nos stelashi,skohe pa bai den marcha of jump in/ jump up. Tin e gran parti tambe ta skohe pa atmirá e fiesta aki kantu di kaya.

E bia aki mi ke toka e punto di festival di Tumba.

Ja kaba un siman a pasa ku nos a korona nos rei di tumba di e aña aki. I pa un koinsidensia e título di e tumba ganadó a toka un punto ku di bèrdat a pone mi pensa……

Unda e ambiente a keda?

Hopi bia mi sa sinta mira kanal 80 ora Hermanito pone videonan bieu di ambiente nan di di tumba den aña 80, 90 i 2000. Algu ku semper mi tabata atmirá tabata e lokura i simplesa ku e evento aki tabatin. Mi ta kue e ehèmpel di festival di tumba den stadion di SUBT. Tur hende tabata bini ku nan t-shirt, pèchi, flùit, kampana etc i tabata un ambiente di otro mundu. E tabata mustra mas manera un mega Jump in no un kompetensia di komposishon. Hendenan tabata baila, gosa i animá tur tumba, aunke ku e tabata bon òf malu. Mi ta kòrda asta un video kaminda ma mira Nildo Martis wòrdu deskualifika pasobra e la kanta tumba pasa tempu, pero pueblo tabata gosa i e la sigui deleitá nan.

Lamentablemente kos a kambia masha hopi mes…..

Awendia for di ora festival di Tumba tei kuminsá ta manera kos ku ta un anunsio di guera a ser hasi. Tur hende ta na kareda i den hansha, pa por buska e “dress” di mas “on fleek” pa por show off. Hopi bia “on fleek” a bira sunú. Buelonan pa Colombia pa bai saka sla i spùit ta yen. I tur hende ta bini “op en top” pa a kameranan HD por kapta nan i  mustra ku nan tei presente.

E loke ku mas ta duel mi ta ku tur e bunita ku baidónan di tumba ta show. Mes laf nan ta para gosa dje tumbanan tambe. E úniko momento ku e públiko por lanta for di soño ta si su banda of kantante faborito presentá. Despues djei nan ta kai sinta manera ta den misa nan ta wardando bùrt pa bai tuma hostia.

Kasi no tin bailamentu mas, no tin lokura no tin e griteria, no ta animá e kantantenan manera debe ser. Mi por imaginá ku kualke un kantante riba esenario ta basta nèrvioso kaba i pa bo haña un response di un públiko friu e kos ei por kaba kubo. Mirando tur e esfuerso ku ta sera hasi pa por trese komposishon na nivel.

E ta un duele.

16603156_1267320136678966_8849205153909526949_n
Fuente: Curacao show Bizz.

Feisbuk

Nos ta bibando den un era digital awor aki i no ta un sekreto mas ku e plataforma di feisbuk ta e manera ku nos ta bosivera nos opinion tokante tur kos. Tumba tambe no ta un eksepshon. Den e siman di tumba ei ta hopi “eksperto” ta sali. I loke ku ta mas iritante ta ku mei mei di hopi kòmplimènt i palabra di ánimo pa nan kantante faborito, hopi ta salo kla pa kritiká delaster un kos ku sosodé. Nada kontra, ta bo paginá bo opinion pero no ta na nodi pa rònt mundu sa ku bo ta spula bo boka ku binager i desayuná ku awa di lamunchi. I ora hurado tuma desishon nan ta kla pa koba tur sorto di mama di loke a sosodé.

Mi ta haña nos mester ban bek na e temporada di añanan 80. Ban hari, ban gosa i tuma e kos aki poko mas leve. Karnaval ta un fiesta di goso i alegria. No tin nodi para tras di hèki, riba high heels ku kara sera. No tin nodi kritiká tur loke sosodé. No ta na nodi pa papia palabra insolente kontra niun hurado pa nan desishon. I no tin nodi bira onsportief komo artista.

Loke ku ta hasi Karnaval great ta ku nos por gosa, dibertí durante e fiesta aki i disfrutá di kada momento.

No laga pa nos fiesta di goso mester bira un otro gera.

Ban biba e letranan di e tumba ganadó i laga nos rementé manera promé ku nos a hasi den temporada di SUBT!

Felis Karnaval.

Copyright: UTS productions, all rights reserved.

 

 

 

 

 

 

 

E luna mas maravioso

Rumannan Dezèmber a jega! E luna mas gusta pa hopi persona rònt mundu i na Kòrsou naturalmente. Ja kaba, container di palu di Pasku a yega i muchanan a kuminsá traha nan di dos lista pa Papa Pasku. Aqualectra a pega lus rondó Punda kaminda nan ta laga nos den suku i radio Hoyer su jingle tambe a kuminsá zona pa anunsiá ku nos a drenta dianan di fiesta.

Den banda di esaki bida ta sigui normal i mi ta hanja ta un bon momento pa nos traha algun dil pa ku luna di desèmber promé nos drenta e lokura.

Ban planta pas

Ana 2016 tabata un aña jen ku gates i bomboshi. Tatin algun ku nos por a hari, tatin algun ku nos por a kritiká i ta tin algu tambe ku a bula tur límite di dignidat. Lo ta un bon idea pa nos pone tur e beef i salads(si bo ta vegetariano) abou i ban purba ta na pas ku otro. Si bo tin problema ku famia bai sinta kombersa i hasi bon. Si bo a hòrta hombi hende i e hombu ke wak su yunan, dune un chèns. E yunan no tin falta. Si bo a pòst paña sushi di hende riba feestboek, tope kara kara boso papia e kos kite foi man i laga nos sera e aña na pas ku otro.

Debe den debe.

December ta un luna hopi karu. Nos mester kumpra paña, sapatu, regalo, karchi i bòter pa den fiesta. Tambe mester drecha kas, pega kortina, dòrna pone kèrstbom i no lubidá tampoko riba tur e kuminda dushinan. Hasi e kos aki segun bo forsa. Shon fia Enca i Poloniuns ta zona atraktivo te ora bo tin ku paga bek. No bai duna bo mes mas doló di kabes. traha un budget i drai ku ne trankil. Ta 1 luna di fiesta e ta i nada mas. No laga pa bo tin ku bende bo Iphone, Galaxy i un Nir pa bo mester sobrebibí e sekura di Januari.

Komporta bu

December ta konosí pa ta e luna kaminda mayoria relashon lo pasa prueba di kandela. Dimes tin hopi fiesta, shownan di pagara i demas aktividat ku lo por pone bo relashon na prueba. Naturalmente tin bòshi damita i yònkuman ku ta sali foi nan hòl pa disfrutá. Esei kemen ku tin hopi vitamina pa wowo. Un supliká por fabor… wak sin mishi!! Si bo ta soltero of soltera wak bon ku ken bo ta anda paso no ta tur loke ta lombra ta oro. Si bo tin bo pareha sali i hasi bo kos kubo pareha. Evita mas #gate pa bo kurpa.  I si bo tin byside…. palabra di forsa na bo.

Harcohol

No ta un sekreto ku na Korsou nos ta buska delaster un motibu pa nos por bebe. Den fin di aña no ta un eksepshon. Si bo ta bebe preferibel buska un hende ku no ta bebe pa kore outo pa bo. I si ta abo mes tin ku kore hasi kos responsabel. No laga bebementu mester ta kousa di bo morto. Otro kos…si bo a dal dos di mas evitá konflikto. No laga pa bo sali riba meme market ku Curacao jokes ta tira moketa den fiesta of den Oompie stroopie su inbox kubo a laga beha den Vip na Spoonz paso ba bringa ranka paña i nan a saka bo afó.  Ban trankil ku bibida alkohóliko i si bo no por ku ne lage den bòter.

Tráfiko

Semper fin di aña tur hende ta haña e sintimentu ku ta mundu tei kaba. Tur hende riba un hansha pa kumpra kos i bai diferente aktividat. Rumannan ban poko poko den tráfiko, si henter aña ba kore bunita. No tin nodi kore K#ka den dezèmber. Ban trankil i respetá tur regla. Pa ponedónan di fever si bosnan ta hasi bosnan kos, para responsabel tambe ta momento ku polis presentá i konfiská bo koi kareda òf duna bo but. No bai reklamá despues paso kon kubo mire bo tabata partisipá den un akshon ilegal.

Medionan Sosial

Lamentablemente esaki tambe ta algu ku nos mester tene kuenta ku ne. Nos sa ku ta December i ta “The most wonderfull time of the year”.  No tin nodi keda ripití esei. Kubo ta gosa, saka pic, snap pone video etc dal bai!! Pero kòrda di gosa poko dje fiesta tambe. Ta poko laf pa bo a gasta tur bo plaka pa bo ta para snap embes di baila, bebe i gosa.  I por último si bo tin ku reklamá e babydaddy ke no a buska drechi su yu den temporada di Pasku, hasi mi un fabor yama e hombu bo zundre. Nos no tin nodi di gosa di bo amargura riba bo wall di Feestboek.

Mi ta spera ku e konseho nan aki lo yuda nos pasa dianan di fiesta felis i kontentu.

No laga pa December mester ta un lokura i Januari habri bo den amargura òf sekura!!

Felis dianan di fiesta.

Curacao Christmas

Fuente: http://curacao.for91days.com/tag/celebrating-christmas-curacao/

Coverfoto: Loop ABC.

Curaçao No Sea Jazz!

Ofisialmente nos por bisa ku aña 2016 lo bai komo un di e aña nan di mas malu den historia. Kuminsando na Kòrsou kaminda ku elekshon a bai mara ku tiramentu di lodo i un kiebro promé ku kos a forma. E diferente “gates” nan, guera entre kanalnan di televishon HD i hòrtamentu di meal plan. Tambe internashonalmente kos no tabata di kanta makamba. Guera nan a sigui, kos a bira pió na Venezuela, Zwarte Piet a bira Schoorsteenpiet na Howlanda i Merka a haña un chiwis brutu, bestia i rasista komo presidente.

Ora nos a kere ku mal notisianan a kaba, Fundashon bon intenshon huntu ku Mojo a trese e notisia tristu ku otro aña lo NO ta bai tin Festival di North Sea Jazz. E organisashon a trese dilanti ku pa motibu ku nan no por a haña artista di taya mundial pa e periodo aki, nan a tuma e desishon di para e konsierto pa otro aña. E sla aki a kai basta duru pa basta di nos na Kòrsou. Hopi hende a reakshoná den shòk i no por a kere loke a sosodé.

Ta hopi esfuerso ta ser hasi pa por partisipá na e magno evento aki. Hendenan ta kuminsá spar foi delantá, otro nan ta pasa serka Shon Fia, Island Finance i Caribbean Cash i tin asta algun ku ta bai kuida e turtuga di hefe òf kambia Vitz pa karchi fiesta.

Drechi pastechi.

Den banda di tur e shòk mi mester bisa Drechi! Di un banda ta nos mes por ke ku kos a bai asina aki tambe. Nos ta un pueblo ku nos ta gusta kritiká i naturalmente CNSJ no ta keda sin hiba vra.

For di tempu ku e evento a kuminsá,semper e organisashon a purba di mantené entrada na un preis pagabel. “Pueblo” a reklamá ku ta muchu karu. Organisashon a disidí di pone un konsierto grátis. Úniko kos ku bo mester a hasi ta para den un rei largisimo pa bo por tuma bo karchi. Tur hende a sera nan boka hasi esaki. Pa despues algun di nan bai hasi negoshi ku e karchinan i bende nan pa preisnan apsurdo.

E organisashon tabata hasi su máksimo esfuerso pa bini ku artistanan di taya sumamentu altu den género popular i di jazz. Den nan tambe ta tin esnan di propio tera ku a presentá. Asta asina tambe algun persona ta tin kurashi di reklamá ku nan no ta paga e preis ei pa wak e hende nai.

Gobièrnu (manera semper ) tampoko no tabata duna su kooperashon tur ora. Nan tambe ta tin e kurashi di por ehèmpel reklamá e organisashon di a stroba selebrashon di dia di bandera. Tur e kos pa motibu ku e organisashon a parti karchi e dia ei.

Mi ta kere ku tur e anda nada di kritika i kosnan ku tabata sosodé rondó di CNSJ, e organisashon riba su mes tambe a ekspresá indirektamente nan disgustu. Nan a trese esaki tambe pa dilanti i bisa ku nan tabata evaluando pa sigui ku e evento. Pasobra nan ta hasi e ku mil amor aunke nan no tin niun ganashi ku e evento. Pero tòg tin ku dil ku hopi reklamo.

Pone bo mes den nan sapatu…. ami tambe lo a bira K%#o para koroto.

Kon kubo mir’é nos ta un pueblo poko mal agradesí. Nos a haña oportunidatnan di oro ku e evento aki. Hotèlnan tabata yen. Aeropuerto kan kan di jet priva. Thot nan tabata biba i kompanianan di fia plaka, hür outo i pakusnan tabata drai bon den e periodo aki.  Pero tòg nos ta tin kurashi di habri nos boka reklamá of probechá di e bon intenshon di e organisashon i hasi negoshi a la toko den toko riba nan lomba.

Mi ta spera ku e loke a sosodé aki ta un lès pa nos tur ban kuminsá siña apresiá e oportunidatnan ku ta presentá pa nos Isla i ku en bes di reklamá nos sostené tipo di evento nan aki masalmente i na un manera positivo pa asina nan por sigui eksistí.

9df980d7edaab76450eabd8160045
Fuente: http://www.curacaonorthseajazz.com

Danki!

Señor Elias, Fundashon bon intenshon i Mojo masha masha danki pa 6 aña largu di alegria pa nos pueblo. Danki pa a trese artistanan grandi i tambe leyendanan musikal manera Prince, Kassav, Juan Luis Guerra, Sergio George i tur su streanan di salsa, Chris Brown, Usher, Stevie Wonder i demas. Danki pa a duna nos artistanan lokal manera Levi Silvanie, Jeon, Pernel Saturnino, Hershel Rosario i demas un podio grandi pa pueblo por a gosa di nan.

Mi  ta spera ku di kurason 2017 lo ta un aña pa boso por sosegá, reflekshoná i kue un bon rosea. Ya asina boso por bini bek mas fuerte ku nunka pa 2018.

Paso maske kiko ku pasa .

T’aki nos ta gosaaaa!!!

North Sea Jazz Curacao, 2010
Fuente: http://www.curacaonorthseajazz.com

 

 

 

 

#Goals

Danki na Internet ku mundu por ta literalmente kompleto den nos man. Esaki ta duna nos e oportunidat di por sa i logra hopi mas ku nos a spera. Pero e mes un Internet aki tambe a hasi e generashon aki unu pió ku zombi. Si ántes un yu tabata kièr a bira jufrou di skol, karpinté, piloto i polis awendia tur kos a kambia.

E generashon awor aki su bista a kambia i awor nan ke bira Kardasians, Rapers, Video Vixen ,Youtube vloger, Snap Queen i jen otro tipo di “job” nobo mas. E ironia ta ku esaki NO ta imposibel paso tin hopi pafó ku a logra pero nos generashon a dal tene duru na esaki i ta esaki a bira #Goals

Awendia siñamentu na skol parsialmente a bira sekundario. Pasobra awor ta kuestion di bo ta habri instagram, buska un fotógrafo i dos tres pida bikini i voila! bo a bira insta-model.  Bota kue bo telefòn of kamera kai bo sinta su dilanti kue bo kilonan di make up, contour aki contour aya “eyebrows on fleek” pinta kara bai gol i bo a bira eksperto di Make-up.  Bo ta bira download un programa di músika, hunga poko ku ne, upload bo koroto i bo a bira producer.  I pa pone chèri riba e bolo ora bo puntra kualke un di nan kiko nan ke hasi ora nan bira grandi… “Min sa”

Nos a bira un generashon ku ta gloria idiotes enbes di duna balor na loke si ta di balor. Nos a lubidá riba e partinan simpel di bida. Nos ta lubidá riba e echo ku den futuro nos mester di karpinté, mèslá, elèktrishèn, dòkter i kòki. Paso nos no por bai restorant bai kome aros ku contour i bo mixer di DJ lo NO por drecha mi kashi fuse.

aaeaaqaaaaaaaaa1aaaajgy4nteyzwvkltexywqtngezys05mzu0lwmymtdmztzmzwflza

fuente: Linkedin.com

Hater

Un fenomeno ku ta karga e asuntu aki pió te parti di Haters. Hopi bia ora bo duna un di e hobenan aki “feedback” tokante di nan manera di pensa. Bo ta tende ku ta Hate hende ta Hate.

Den siman tras di lomba un flamante ex miss Korsou a tuma un kabei boto. I durante e kabei boto e la bisa ku e ta kontentu ku hende ta HATE paso nan por sigi HATE i e ta sigi bai dilanti.  Naturalmente riba Facebook esaki a bai kompañá ku hopi aplouso i hopi hende ku  ta suport su kousa paso hopi hende ta HATE riba dje paso e la logra hopi den bida.

Un persona riba Facebook en kuestion a hasi un bon pregunta tokante esaki:

Na ki momento bo a logra algu den bida ?

A) Na momento ku bo tin un monton di followers riba Instagram, pero ta riba stiff di hende bo ta biba ketu bai i sharementu di daily inspirations a para bira un hilu mei mei chanchan ?

B) Ora ku nèt pa 10 seconde b’a logra sali den video di un artista di rap famoso, despues ku nan a kaba di keur bo mane ta un baka ku tin ku bai slagerij bo ta ?

C) Despues ku bo a kaba di interkambia skupi ku diferente artista famoso den mesun aña 2016 aki, pero supuestamente bo no ta korda i tampoko niun no a ‘put a ring on that finger’ ?

òf

D) Na momento ku bo a nifiká algu pa otro hende òf bo komunidat, sin ku mester a rekompensá bo den un forma ku material ?

No ta hate mi ta hate. Ta konfundi mi ta kiko ta  #Goals den 2016 aki. Pues klara mi.

 

Kiko mi tin ku splika un alumno dimi ora mi papia ku ne riba un tipo di komportashon asina aki pa su mes bon i e ta habri boka grandi paso ta hate mi ta hate?

Mi ta hanja nos mester ban bek na kuminsa duna atenshon na bon ehempel nan den komunidat. Mi ta hanja nos tin ku ban bek i wak riba #goals nan di nos super deportistanan pafo manera: Andruw Jones, Churandy Martina, Andrelton Simmons i Kennely Jansen.                                                                                                                                                  Modelonan manera : Kanisha Sluis, Deva Dee Sillie i Shafny Vierbergen.                          Musiko i Artisa manera : Jandino Asporaat, Levi Silvanie i Andy ku Dorothy Sherman.           Akademiko i Sientifikonan manera: Mariano Luis “Pitosh” Heyden i Dr.Bob Pinedo.

I Naturalmente tur nos studiantenan na Korsou i den eksterior ku di un of otro manera ta hasi nan bèst i lucha duru tur dia pa por logra nan metanan den bida. Esnan ku un dia a kue bus/trein/tram i bus kome pan bebe awa. Pero ku sodó di nan frenta a traha duru i a logra metanan den bida.

Esnan ku nan a bisa ku nunka e no por a logra nada pero ku awor tin su trabou honesto. E bon yu di Korsou ku no ta buska moda di jega na gloria via e kaminda fasil pero ku inteligensia, honestidat i trabou duru.

Esnan ku ta real life #goals!

 

 

 

 

 

 

 

E balada di shon Esther. 

Pa hopi, e luna di Òktober ta e periodo alternativo pa por bai ku vòngkòngsi. Pa esnan ku no a logra bai den vòngkònsi grandi e ta un bon oportunidat pa bula afó ke famia.

Pa nos na Kòrsou den mayoria kaso e ta bira un biahe pa Miami ( pa nos bai kana slènter den Dolphin mall i papia riba le senk di esnan ku tei shop den Ross). Òf ta skohe pa bai  hermana isla Boneiru pa bai gosa di regata of kore buska Oompie Stroopie pa saka selfie ku ne. Bo tin esnan tambe ku ta opta pa bai hasi un biahe krusero pa asina konosé diferente pais òf isla den un tiru.

E komunidat antiano na Howlanda tampoko no ta blijf achter. Tin hopi ta opta pa bai Inglatera, Fransia of kualke pais mas serka den Oropa. Pero tin algun ku no ke aseptá ku friu a drenta tera. Nan ta bai buska kalor na Spaña. Un di e sitionan faborito pa hopi ta e siudat di Lloret de Mar.

Ku un bunita paisahe, beach i un klima hopi dushi. Lloret ta perfekto pabo por pasa algun dia tremendo lubidando riba DUO, Belastingdienst i e weer ku ta kambia pió ku muhe den su periodo. I e bon ta kubo por yega ku Avion, Trein, Outo of Bus.

Aki kos a bai sinta.

Den kaso di señora Esther, e tambe a pensa meskos i a organisá e biahe aki.

Hopi yu di Kòrsòu ku a pensa ta mas fasil asina ki ja ku ta un paisano ta organisé. A traha duru, spar i konfia señora Esther ku nan Euro’s nan pa pasa algun dia kontentu. Grandi tabata nan sorpresa ku ora nan tabata pará na stashon ta warda bus. Ni bus, ni señora Esther no a presentá.

Naturalmente un disgustu a lanta i tur hende a pensa ku señora a dal nan palu di otro mundu. Pa skapa kara di Esther, famia i konosí a sali pafó bisando ku kos no a bai dor pa motibu ku e la haña atake di kurason i e ta den hospital. Esaki a bai kompañá ku un foto dramátiko di señora Esther drumi tete afó tur na waya komo prueba.

Hopi biahero no a keda konforme i a bai buska pa sa kiko tin bèrdat tras di esaki. Pa pone sla den due a resultá ku señora no a ni bùk hotèl. Ja ku e hotèl no tabata sa mes ku e grupo aki lo a bin keda einden. 

E ta un duele pa mira kon e hende nan aki ku a traha duru pa nan por bai relahá. A haña un paluska formal serka señora Esther.

Pero di un banda lo mi bisa drechi! Dikon?  Pasó abo ku a bùk sa bon bon den ki labatiba bo tei hinka bo kurpa ku algu asina aki. Pa e mes un preis ei tin hopi otro tour operator di buena fe ku si lo a yuda bo yega bo destinashon sin dolor di kabes.

I pa señora Esther i su konsorsio, hasi nos un fabor, kumpli kubo klientela i duna nan nan sèn! Paso komo “empresario” bo sa dje risiko nan. Bo mester a organisá bo kos na drechi registrá pa un seguro di biahe i prepará pa si den kaso lo bo a bira malu manera awor aki. Bo tour por a bai dor. Lo bo a gana bo pida Eurows i tur hende lo tabata kontentu.

Mi ta spera esaki ta un lès pa ámbos partido. I ku lo bini un solushon pronto pa e problema.

I un último tep…. buska bon informashon promé bo disidí di bai ku tipo di Tour nan asina aki. I tuma un seguro di biahe paso….

Kos barata por sali bo karisimo!

14716178_1316150555082557_7236362580010589267_n

Bron: Facebook/ibisimages.com

Despues di elekshon ta kùp ta piki

Agradesido na Matthew pa e retraso, ántayera por fin nos por a selebrá nos demokrasia. For di mainta hopi hende tabata riba pia, algun a tuma liber  otro a haña mitar dia liber ku e meta pa tur hende por a bai hasi uso di nan derecho di voto.

E folklor na Kòrsou ta konosí pa hopi ambiente, alegria i naturalmente bomboshi. Tur polítiko a bai depositá nan voto ku nan show adekuá i tabata sigur di nan mes ora nan sali urna. Aunke ku tur kos a kana trankil naturalmente ta tin algun kos ku a hala nos atenshon.

Karma.

Ayera tabata un dia di kual nos a haña un tremendo lès tokante Karma. Miembronan ku a bai na malu for di otro keriendo ku kos lo a bai mihó pa nan, a resultá awor riba kaya.  Mi ta papiando por ehèmpel di MAN ku PAS.  PAS a lanta pa motibu ku algun miembro tabata mal kontentu ku e maneho di MAN. Nan a tuma nan retiro i lanta nan mes partido. Grandi tabata e sorpresa pa tur hende ku e partido ganadó a resultá MAN. Un partido ku un lider trankil i ku a hiba un kampaña kokochá ( paso su pia tabata kibra) pero sin ningun tiramentu di lodo.  Man a bari bai ku tur votadó i PAS a haña nan ta keda sinta lombra wowo, bebe ròm i hunga dominó na sede numa pasobra ta un kos so a keda nan. Di Sosegá na PAS.

Otro ehèmpel tabata Dr.Mozes ku a bati bai laga PAIS, hopi a kere ku Dr. Mozes su Movementu Qsign, sorry mi kier men Movementu Progresivo lo no a score at all. Pero aki tambe ròlnan a bòltu ora a resultá ku Dr.Mozes su SO a haña mas voto ku su èks partido PAIS kompleto! Ki nos por bisa…. Rest in PAIS. Ironia tabata ku Charlie di PAS den debate a bisa señor Rosaria lo siguiente ” awe bo ta bai kas” . A resultá awor ku tur dos tin mag di tene man huntu i laga lastra.

Ban wak si nan ta bai join Curacao Zoo pa yuda kuida algun bestia.

Muchachito Lindo tambe ayera tabata por la goma. Historia a bolbe ripití ora su partido ku a stalk nos hinter aña ku lòt, propaganda den tur medio i asta stroba nos di wak video riba Youtube. A logra su 4 asiento pero a kai chikí bou di su èks partido ku ta MAN. No a keda mener Skòter nada otro di yama e otro partidonan pabien, dobla warda i bai pensa awor kon e ta bai skapa su kurpa den korte òf kambia su bida. Esaki pa motibu ku e dos otro partidonan a bisa direktamente i indirektamente ku nan lo no ta dispuesto pa traha ku ne.

14589907_1688561851471214_6709642578887148445_o

Bron: Skucharapodcast

Mi ta hasie pami, nos ta hasie pa bo.

Den tur e gera friw ku polítikonan tatin. Tatin un otro gera den media tambe. Esun ku sin duda a kapta hopi atenshon ajera tabata esun entre TV Direct HD i Telecuracao. TV direct ku nan prestigioso direktora señora Jasjes, a bini ke novum di introdusí e promé kanal HD na Kòrsou. Esaki sin mas a resultá un sorpresa hopi agradabel pa pueblo i ta hopi bon komentario ta tin tokante su kanal. Te ku dia di elekshon ora ku sin nan a kere nan a lanta e gigante for di soño. Telecuracao a bini aden ku un produkshon mega i sorpresa tur hende. Nan a lansa un dekòr nobo , pantaya di LCD den background, Drone i asta un “mega touchscreen” ku a pone Glenn keda fula screen bai gol!

Loke tabata remarkabel tabata tambe ku tur kos a kana zeta i informashonnan tabata al kaso i no tabatin ningun ripitishon. Al kontrario na e kanal HD hopi reklamo a kuminsá kai pa nan ja ku ta un bromamentu di otro mundu ta tin i NO dunamentu di informashon. Bo tabata wak senjora Jasje den su Jumpsuit mas ku e politiko i reporteronan i ku kos tabata kana brua. Ku e resultado ku hopi yambo bieu a bolbe wea i a sigui sintonisá Telekorsou te final di elekshon.

Naturalmente esaki no a pasa asina asina bou di señora Jasjes su “nanishi”. E la tuma e oportunidat pa habri afó ayera mainta i papia un skat di disparati tokante e otro kanal di televishon ja asina e por a tapa su propio falta di kalidat i kontenido.

Image result for telecuracao   Image result for tv direct curacao

 

Mirando e akontesimentu nan aki , nos por konkluí ku e elekshon di ayera a laga algun lès importante atras.

Mala fe no por gana buena fe.

Karma ta un tefi

I ku basora bieu konosé tur huki di kas!

coverfoto: gassandanawi.com