Resúmen di GATE

Después di saté batata, i “nelson” di Kòki riba Blòki, bòmbòshi ta e plato di mas gusta riba nos isla.  Si bòmbòshi tabata un deporte olímpiko, Kòrsou lo a gana oro den tur kategoria. E úniko momento nan ku nos pueblo ta uni ta na happy hour i pa mira otro sufri. Telefònnan ta rin sin stòp i medionan sosial manera féésbuk ta mas kayente ku un batata den fòrnu. Trabou ta para tur kompania paso whatsapp ta drenta i mester atendé esei promé ku kliente.

Grandi, chikí, hustu, pekadó, polis, stewardess etcetera…un i tur ta kai den trans di e famoso GATE. “Amiga ba waaaak?” , “Gaña!!!! Ma bisa bo ta hòmbu di hende” i “Ami si lo a batie te ora mi haña mi sèn” ta skeiru pa loko mane promesa di polítiko. Masha ten e ser humano ta alimentá su alma ku problema di otro.

Kòrsou ta un isla kaminda semper tin kosnan remarkabel ta sosodé pero niun hende no por nenga for di sèptèmber último kosnan a mane kue un rumbo apart.

THOT gate

Tur kos a kuminsá ku e famoso Thot Gate kaminda dos damita a bai pasa anochi den Chris Brown su suite aya na Santa Barbara Resort. Aparentemente awa a kai hopi duru i Chris a sòru pa un refugio. Su siguiente mainta un di e damitanan a demostrá su apresio pa Chris elogiando su bon kurason di a tuma nan den suite. Ta aki kos a bai foi man, pia i asta uña. Medionan sosial a eksplotá ora un radio konosí a duna e damitanan aki e título di THOT. En fin. Despues di un par di entrevista ku entre otro Chris Strick i algun oferta pa hasi propaganda pa lòlipòp e insidente a plakia.

The Djènsens gate

No a dura masha ku ya e siguiente gate tabata kla pa ranka sali: Keeping up with the Djènsens. Den e kaso aki un problema familiar entre subrina, tanta i prima a bai parese te riba féésbuk i plama tur kaminda pió ku huma di isla. Hopi sekreto a keda divulgá. A papia di 46 tipo di operashon, bibamentu riba stef di wela i yu ku ta mas bunita ku subrina. Tur kos ku subi mester baha aki tambe ala fin ala fan e kuenta a kaba i Monifa a bai resultá den un video clip pone tur hende baba.

Esther 7 ORO gate

Siguiente pashènt riba e lista di gate a resultá di ta Esther 7 ORO. Den su tempu di gloria Esther mes tabata pone, Bon Kune, Bingo, fiesta di Kòmbèk i wega Mens Erger Je Niet den e famoso siudat di Rotterdam. Ku tantu éksito tras di otro asina ta lógiko ku e siguiente paso mester a bira unu internashonal. Bon konfia un grupo grandi a duna Esther nan plaka a kambio di un vònkòngsi ku bus pa Spaña. Grandi tabata nan desapunto ora ku riba e dia di salida niun bus no a presentá ni tampoko por a haña Esther. Mesora vershonnan a kuminsá sirkulá ku sea Esther ta skondí huntu ku pastor Simon òf e la kaba di dal tur hende un bon bagon. Loke a sigui tabata un kantidat di menasa i insulto den Esther di direkshon. Famianan hostiná a buske pa bati sin por keda kla. Ni Esther ni e 90.000 euro ku e la roba nunka mas a keda mira.

Tio Felipe gate

Djis despues ata Tio Felipe ta buska fama. Bende un bus pa un suma di 7000 florin pa siguiente dia banko kue den beslag. Ayó bus, ayó 7000 florin. Tio Felipe mes a para riba di ta inosente miéntras ku su víktima a kunsumí hera di haña ataka. Na final de cuentas Tio Felipe a tira falta riba banko i hasi mane mundu ta kontra dje.

Gibirititis gate

Gibi. Musiko di mil kampaña pero manera tur machu krioyo e tambe stima un saya. Sinta ta kome trankil den Acoya su señora a yega gare ku su prima den gloria. Pa evitá lo peor Gibi a sali na kareda i bai laga tur partisipante di Fatum Loop. Mesora féésbuk a yena ku komentario i Gibi mes a bin papia di si bo no tin pika etcetera etcetera. Nos no sa kon a para ni Gibi, ni prima ni señora pero Acoya si a haña su plaka sinta den stul di zoya.

Mason SnapChat gate

Moni toks ma bira saka ….. riba dje euuhh. Ken ku bo puntra ta bisa bo ku e letranan aki ta pertenesé na e famoso rapper Mason. Ku un fanatikada asina grandi ta hopi tempu bo mester tuma pa atende ku nan. Kanalnan di komunikashon manera Snapchat ta ofresé un bon alternativa pa esei. Ku un video di por ehèmpel 10 sekònde bo por laga mundu sa ku bo a kaba di kome un apelsina, drùip pa bo eksamen òf ta labando paña. Bo por hasie di un manera priva o sea pa 1 persona spesífiko òf tur hende mira. Kua di e opshonnan aki shon Mason a skohe ora di estrená su blòki di habon Lux nos no sa. Bo mes por komprendé kon por ehèmpel whatsapp a bira. Un mandamentu di video mane salmo riba djaluna mainta i vários hende muhé ku publikamente a deklará di ke kuida Mason su kabes di turtuga.

Un dia despues ata Eduard Braam ta tumba gobièrnu promé ku esaki a forma… Asina ei nos ta keda ku man yen di gate manera esun di Ydellienne Dildo Heerenveen i Shayna Hellemun su MealPlan.

Pero danki Dios awe ta djamièrdè. Por fin bo kolega su kara a habri i tur hende ta papia di fiesta i paranda. Mi ta deseá bo un felis wikènt pero kòrda tambe ku maske:

Zita Jesus Leito di Par a duna Amerigo Thode, Pik Pisas i Jacinta Constancia di MFK un kabe’i boto pero ora di forma gobièrnu si e la dera tròt bai laga nan, Yves Cooper tin su mes radio awor i esei ke men ku bagamunderia ta den krili su wela i e dia nan aki polisnan ta por la goma i pesei tur muhé grandi ku ta frei gai chikí a siña nan gaña “ ta mi Dina” ….

T’aki mi ta BEBA

 

 

Advertenties

Insel Air: piñata di pueblo

Después di orkan Matthew i Gerrit Schotte ta nos kompania nashonal di aviashon ta tópiko di kòmbersashon ùltimo dianan. Kara di hopi hende ta trèk ora bo menshona e nòmber di Insel Air. Ta manera kos ku ta un glas di binager ku èis bo a ofresé nan. Hopi retraso pa motibu di problemanan tekniko òf “crew” ku mester sosegá. Loke tambe sa wòrdu bisá ta ku tin varios avion den e asina yamá C-check. Di tur manera ningun di e motibunan aki no ta fria doló di e kantidat grandi di pasaheronan hostina.

Insel Air ta sufri di un virus ku mayoria bia ta surgi nèt den temporada di vòngkòngsi. Manera minister Nelson Navarro a yega di bisa: “Fasten your seatbelts”. Ora e virus manifesta su mes a ni hasidónan di brua kombiná ku dos indjan brabu no por paré. Bula ku Insel den e temporada ei ta bira mes kos ku kasa ku un muhé ku a yega di mata su kasá: un ora pa otro e por bolbe eksplota. No ta awor Insel ta sufri di retraso-ritritis. Mei ora òf un ora di retraso pa mayoria di nos no ta un problema pero asuntu di 6, 10 ora òf vuelonan ku ta keda kansela si ta bira dimas.

Insel Air ta un kompania ku trahadonan hopi motivá i flèksibel. Nan ta traha tur dia den un avalancha di kritika. Por ehèmpel e personal na tera. Bo sa kiko ta duru? Lanta mainta sabiendo ku atrobe bo por spera pasaheronan rabiá. Kobamentu di mama, menasa di agreshon físiko i palabranan manera “bosnan no ta sirbi” i “ mi ke mi sèn bèk awor” ta skèiru pa loko den nan orea. Tin hasta kaso kaminda a saka potrèt òf graba video pone riba internèt. Imagina bo si ta bo frei, kasá, ruman, mama, tata etc. Un kos nos tur ta di akuerdo kuné… Insel Air mester drecha su servisio pero laga nos tambe respetá su  trahadónan.

Mi mes a pasa den basta kataklisma ku Insel Air. Fo’i retraso, vuelo ku a sali mas trempan lagando mi na tera, maleta ku no a yega i avion ku a bira bèk después di tabata 30 minüt den laria. Mi a rabia, kunsumí i desea Insel Air for di dengue te malaria. Segun tempu ta pasa i Insel su retrasonan ta baha kaba subi pa na final bolbe baha mi a realisa algu. Pa mi sinta sofoka mi alma ku algu ku mi mes no por hasi mashá na dje mihó mi kai sinta trankil i por ehèmpel skibi e blog aki.

Laga nos ta sinsero ku otro. Tin hende ta reklama djis pa otronan sa ku nan ta bayendo di biahe. Ekspreshonnan manera: “oh i’m going to miss my connection to Atlanta” , “Ken ta paga e anochi pèrdí di mi hooowtèèèl na Mùrka” i “Oh my God, we are going to miss our cruise” ta zona pa bai dilanti riba Féésbuk. Tambe tin esnan ku ta bula nèt 1 bia pa aña pero ta pone drama hasi mané aeropuerto di Kòrsou ta nan di dos kas. Laga nos no lubida e èks trahadónan di DAE. Den nan tin un grupito ku no por warda Insel Air bai falliet pa nan bisa: drechi! Mi no sa kiko un of mas empleado di Insel Air lo a hasi pero aparentemente tin un odio ku hopi furia ta reina kontra di nan.

En fin. Ta parse ku awor si mi vuelo ta bai sali. Laga mi hasi un orashon promé mi subi avion. E blog aki kon ku para keda lo sali djamièrdè 12 or. Si mi no yega mi destino mi ke pa boso sa ku mi stima boso tur.

 

Felis wikènt

Saka di baby

No tin nada mas bunita ku mira bo yu nase. Loke bo ta sinti ta mil bia mas dushi ku ora bo kaba di paga debe di estudio. 9 luna mi a warda i porfin mi tin bo den mi brasa. E 9 lunanan ku a pasa tabatin nan kos bon i menos bon. Komo tata bo ta wòrdu felisitá den promé instante pero djis después bo ta para bira un “don nadie”. Laga mi kontá bo kon e kosnan por bai. Na final bo mag di hari, yora òf bati man. Un kos ta sigur: bo bida ta kambia pa semper.

Awor numa bo a traha mucha?

35 aña mi tin i esaki ta sufisiente pa ta un “Opa” den e mundu di awendia. Nos ta biba den un tempu ku un mama tin 15 aña, wela 30 i e bisawela 45. Naturalmente tur hende mester sa ki ora nan ta pega fòrnu i traha pan pero e ta keda un kos pekuliar pa mira. Huntu ku mi tin hopi mas ku sea “awor numa” tin un yu òf nan ta trahando riba dje. No puntra mi ta dikon awor numa mi a bira tata, puntra bo mes ta dikon bo tin tantu gana asina di sa. En fin. Yu ta kosta plaka i sigur si ta abo ta e toro di kurá. Fo’i kumpramentu di e “baby kamer” te ku ponementu di fiesta di boutismo etc ta e tata tur hende ta drai wak.

Ayó bo pòtmòni

Antes bo ta sali na estado i haña yu. Aworaki ta masha kos a bini aserka. Bo ta kuminsá ku entre otro “pregnancy anouncement” , “baby gender revealing party” , “ baby shower” i bai kaba na e “welcome home baby party”. Amiganan ta kana inventa yen fiesta pero kasi niun no ta saka un debchi fo’i nan mes saku (wak nan komé mi aki). Banda di esei semper tin hasimentu yalurs den nan ku nan. E promé kos ku ta wòrdu hasí ta traha un whatsapp group pa plania tur kos. Kada miembro ta haña nan tarea i komo hende hòmber bo ta pensa ku esaki ta sufisiente pa por kuminsá. Siguiente dia mes e problemanan ta start den nan. Reklamonan manera “Waarom mag zij alle leuke dingen doen?” , “Bosnan a kòrda ku mi ta vegetarisch?” , “Ta ken a bestèl e kosnan chapo ei?” i “E la gewon invitá mi èks” ta zona pa bai dilanti den bo kabes.

Ta kiko bo a kere? Ku nan ta bai reklama otro? No! Nan ta bin konta e pober tata i bisé pa pone un paro na e asuntu.

Tata no ta konta

Si bo a kustumbra di ta e sentro di atenshon den bo relashon anto wanta bo kurpa. Fo’i ora bo haña sa ku bo frei/kasá ta na estado bo ta den servisio di dje i bosnan baby. 9 luna largu bo tin ku pone un sonrisa riba bo kara i kumpli ku tur deseo. “Dushi mi ke éiskrim” , “Dushi trese bolo di Centrum pa mi” i “Dushi e holó di galiña ei ta wal mi stoma, kumpra lomitu” ta un kantidat chikitu di kosnan ku bo mester tende tur dia di nobo.

Loke ta mas remarkabel ta kon sobrá di mundu ta reakshoná riba abo komo tata. E partero/a por ehèmpel no ta ni puntra bo konta. Manera un pida asesorio bo ta drenta su kantor kai sinta mientras bo señora ta wòrdu saminá. Tin di nan ta asta puntra: “Bent u de vader?”

Komo hende hòmber bo mester hasi bo mes util durante di e embaraso. Sòru pa e kamber di baby keda harmá, chèk si tin plaka. Kontrolá e lista di invitado pa tur e “surprise parties” nan ku ta na kaminda pa evitá rabiamentu i yuda buska un krèsh apropiá.

E gran dia/anochi/marduga

Laga mi spar bo tur e bululú di den “verloskamer”, suegranan ku a yega na bòshi i amiganan ku ta pará mané ta Chris Brown nan ta warda sali fo’i su suite. Pa no papia mes di tur e 100 mil wòtsòpnan ku ta drenta puntrando redu. Tin hende ta asta kere ku nan tin derechi di mira e parto “live” via Skype òf Facetime.

Komo tata ta un previlegio pa mira bo yu nase i ku esei un bida nobo ta kuminsá. Awor bo ta e kabes di kas i esun ku tin e deber di kuida su famia.

 

 

Bo mama su Djèz

Fo’i chikí nos a siña pa keda leu for di hende bashí ku gusta broma. Den e famia di insekto nan ta kai nèt bou di kakalaka: difísil pa mata i den tempu rèkert nan ta plama. Di semper nos ta un pueblo ku gusta broma. Naturalmente esei no tin nada robes kuné. Ta mashá normal ku bo ta orguyoso di ken bo ta i loke bo a logra pero kòrda ku esaki tambe tin su límite. Aparte di fin di aña i karnaval, Curacao North Sea Jazz Festival ta fungi komo un momento perfekto pa e tipo di hende ariba deskribí sasia su set di broma pa otro nan su bista kai riba dje.

Djèz ta duna státus

Nos a krea e impreshon ku ta hende bon studiá, ku a biba den eksterior i ku plaka so ta forma parti di e públiko baidó di Djèz. Nan aparensia ta shen porshento di un yu’i Kòrsou pero tòg nan ta opta pa puntra bo na Hulandes: “En… heb jij je kaartjes al?”
 
Echo ta ku e festival aki ta wòrdu bishitá pa hendenan for di tur gremio den nos komunidat. Riku, pober, blanku òf pretu, tur lo purba para te dilanti i hunga ròl di kanta Chris Brown su hitnan. Al fin al cabo no ta e artista ta konta si no bo potrét siguiente dia riba Internet. Komo rekuerdo di e anochi bo por haña bo ku nòmber di baby manera Chrisbrownson i Chrisbrownshentely. Basta tur hende ripará ku nan tambe a bai Djèz.

Lokura pa karchi

Maske kon trempan benta di karchi kuminsá tòg semper nos ta kore kabes di gai na último ora. Esei mes ta pone ku ta start un bendementu di karchi na preisnan ridíkulo. Laga nos tuma komo ehèmpel e show di djaweps. Ta konosí ku e karchinan aki ta grátis. Loke bo ta paga ta un kontribushon chikí pa yuda e instansia kaminda bo a bai para den rei pa tumé. E aña aki e kontribushon tabata 5 florin. Ku un kara labá mané un yu ku nunka no a haña lechi di mama vários persona a pone nan karchi na benta pa sumanan entre 250 pa 450 florin. Tin a uza e argumento ku nan para 4 ora den solo miéntras otro nan ta manda tur hende sera smul pasó niun hende no tin nada di bisa. E organisashon di Djèz a saka asta un komunikado kaminda a indiká di pone multa di 20 mil florin pa esnan ku purba bende e karchi di djaweps. Esaki tampoko no a yuda.
 
E kos di mas tristu ta ku nèt esnan ku ta aparentá di no tin mester di plaka a pone nan karchi na benta pa un montante na balor di likidá debe di DUO òf un AUDI A4 nobo aya na Skèrpènè.

Fenómeno nobo: Baimentu di “live” na Djèz

Nos ta spera di kurason ku UTS i Digicel lo no permití esaki. Imaginá bo mes miles di hende pareu ku telefòn den man ta drai rònt i ta grita: “nos ta live na Djèzzzz”
Duna e hendenan ku si a bini pa gosa i no broma un chèns. No ta nan falta ku bo a gasta 700 florin òf mas na karchi i awor bo ke laga mundu sa esei. Aparte di molèster pa bishitante e asuntu di bai live aki tambe por forma peliger pa tur baisait. Nan lo mester kana por lo ménos 20 meter leu for di e pai pa evitá ku e señora na kas por haña sa di nan presensia. Ojo shonnan: laga nos tene sikiera e festival aki liber di bòmbòshi entre pareha. Pa esei nos tin festival di tumba. Asina kaba di saka rei di tumba ta start un mandamentu di stul di “catsuit” pa “catsuit”.
 
En todo kaso. Kon ku bai bin awe ta djamièrdè. Miéntras nos ta pueblo ta di focus riba Djèz, aya banda trahadónan nan di kontratista den Refineria di Kòrsou ta lucha pa un CAO. Un situashon diferente pero ku ta konserní tur hende….
 
Felis wikènt

Drumí riba lomba tur bòdi ta bon!

Ban papia di loke tur hende sa pero ta opta pa keda ketu. Awendia operashonnan kosmetiko ta mashá na moda. Avionnan ta sali pa Venezuela i Colombia kargá ku muhénan kurpa di Lego, sorsaka i loder. Mientras ku nan ta riba mesa di operashon pa bira bon danki, pai ta dushi drumí band’i un otro muhé bon tanki. Si bo ta kere ku e tipo di operashonnan aki tin di haber ku “tenementu di hòmber na kas” anto bo ta gran ekibuká.

Tabú a para bira kustumber

Antes muhénan tabata gaña ku ta Colombia nan ta bai pa kontrolá matris, kumpra rekuerdo pa fiesta di risibimentu òf kompaña un tanta ku mester operá katarata. Niun hende no tabatin mag di sa nan drechi. Na nan yegada tabata dal trabou un AO i tira falta riba griep òf uñero. Maske por a nota un kambio den e size di pechu, atras i hep tur hende tabata keda boka ketu. Na 2016 operashonnan kosmetiko mihò konosi komo “ban drecha bòdi” ta mas komun ku para 45 minüt den rei na Mac Donalds.

Ta géng grandi ta sera kabes subi avion. Esun ta bai chupa vét, e otro pa drecha elastik di kara ku a laga lòs i tambe tin esnan ku por ehémpel ta haña nan brasanan muchu diki. Esnan sabí ta skohe un klinika ku ta den un sentro komershal. Na Caracas tin unu masha popular. Yunan di tera ta kana lastra bòter di infus pariba pabou buskando un jeans na size di e kurpa nobo.

No ta pa loko ta bai Venezuela

Òf kualkier otro país ku ta popular pa e tipo di operashonnan aki. Parse ku na Kòrsou siruhanonan internashonal tin ofisina kaminda nan ta organisa sita pa hasi un “intake”. Ta kue bo preshon, skucha bo pesadia pa na final ofresé bo un plan ku ta mará na sierto gastu. Nèt e ultimo aspekto ku nos a menshoná ta hasié hopi atraktivo. Parse ku pa 60 dòler merikano bo tin un “beugel” pa 900 ya bo por deshasi di bo pechunan ku si bo dal un kareda sin bh, nan ta klap den bo kara òf den di esun ku ta koriendo bo tras i pa menos plaka ku dos anochi di jazz bo atrasnan por kanta nos himno nashonal sin pega.

Naturalmente e tipo di operashonnan aki mes kos ku tur otro ta bini ku sierto risiko. Tin hende ku por koba pos ku nan pechu debí ku nan a pérdé heful. Tambe tin esnan ku por dal un outo kibra totelòs ku djis un karisia di nan atras yená ku betòn.

Pa ken bo ta hasié?

Obviamente kada ken tin nan motibunan personal pero tin algun di nan bastante remarkabel manera:

  • Mi mester di un trabou den gobiérnu i e hoofd van dienst gusta muñeca transformá
  • Si mi bisiña mal awa mes a drecha bòdi pega hòmbu dikon ami no?
  • E pone 300 cc di pechu, ami ta pone 400. Nooit van je lang zal ze leven e no por ganá mi
  • etc etc

Nan ta bisa ku hende fuma no sa gaña. Den siman ku pasa nos a puntra un buraché konosí di pariba kiko e ta pensa tokante e tema aki. Ku un kara serio e la kontesta:

Bon por lage pompa Oompie… Tur muhé drumí plat riba nan lomba tin bon kurpa!

Músiko, polítiko i kakalaka

Si bo no sa ku dia 30 di sèptèmber awor tin elekshon na Kòrsou, ta paso sea bo èks a hasi brua pa bo òf bo ta drumí den santana kubo mannan di bui. Diferente partido ya a start ku nan kampaña i féésbuk ta un medio mashá gustá pa hasi esaki.  24/7 bo ta wòrdu bombardia ku video, potrèt i tekstonan manipulativo. Diripiente tur partido sa kiko falta Kòrsou i kon mester dreché. Den e blog aki nos lo elabora riba kosnan remarkabel ku ta sosode rumbo pa elekshon.

Pushi ku kachó riba lista

Algu ku a prueba su mes di ta sumamente efektivo ta e asuntu di yena lista ku hendenan popular. No ta importa ku por ehémpel nan no sa alfabét òf ku te ainda tin di nan ta kere ku nos isla tin un Gezaghebber. Nan funshon ta pa atrahe voto. Músiko nan popular, Young Professionals bailadó di kizomba, pastor i Rasta Bals di Biesheuvel tur ta wòrdu reklutá. Te asta Oompie Stroopie nan a pidi pero aki nos a kontestá:

Nooit van je lang zal ze leven

Si bo analisá sierto lista di partido bo ta kapas di kere ku ta festival di Tumba tin den sèptèmber.

Politikonan ta paresé den pueblo

Promé ku kampaña nunka bo no tabata mira nan di aserka. Awor nan ta riba féésbuk ta duna pabien, kondoler, komentá bou di diskushon òf sinta kurpa kan kan di “norit” ta kome na Plaza. Den supermarket, na laman, na skol i riba parkeerplaats di kualke misa nan tei. E dia nan aki bo por kue mas polítiko ku Pokemon. Nan ta parkeer nan outo di 100 mil florin na sede, drenta den konvoi ku èrko i drenta bo bario. Ora bo kere ta un Testigu di Yehova ta na bo porta loga ta shon òf señora polítiko. Anochi nan ta sinta “Face Time” ku nan yunan bibá na Boston, Paris i Londen pa kontanan aventura di kana den bario marginá.

Tiramentu di lodo i puña

Tur dia di nobo tin bòmbòshi den korant, riba féésbuk i na radio emisoranan. Minister ku debe plaka na supermarket, un otro ku ta uza “dienstwagen” pa chék zeta di baisait i otro ku a bebe ròm bèrdè te dal abou. E dia nan aki ta un pelea ta dominá: M kontra O. E dos damsnan aki ta bati otro mané piñata na fiesta di mucha. Ekspreshonnan manera:

Bai buska H….. su wesunan den santana na Veeris bo traha yambo kuné, Laga traha dos sél banda di otro ya mi por straight su kabei

ta skeiru mané nada no a pasa. I e pueblo mes ta keda ketu. Kon ku bai bin ta un prima, amigu, tio, madrina ta riba lista i mester vota pa nan….

Bo no mester kompartí nos pensamentu pero e pais aki lo no bai dilanti pa medio di elekshon. Ta nos mes por ke ku awe e nivel di hasi polítika ta unu deplorabel. Nos ta asepta karchi di telefòn, blénder i 300 cc di pechu a kambio di nos voto. Nos no ta tribi di reklamá pasó ta nan mes a yuda nos haña trabou, basha asfalt den bario i limpia roi ku tabata yen di mata.

Nos ta un pueblo mansu, siegu, ku miedu i manera Yves Cooper ta bisa: den krili nos wela.

Resúmen di siman (1-8 yüli 2016)

Despues di basta tempu nos a disidí di skibi un resúmen. No pa bo hari so pero tambe pa tene bo na altura di kosnan remarkabel ku a sosodé durante di e siman ku ta tras di lomba. Tambe e yuda refreská bo mente labando tur loke ta polítika, religion i otro bagamunderia bai kuné. Gosa di dje.

Pamela Cathalina ta defendé Kòrsou

E yùfrou aki stima su isla. Esei bo ta mira klaramente den e siguiente video kaminda un otro di yu di tera ta papia malu di su mes lugá. Semper nos a lanta tende ku ta dos kos tin hodidu riba e mundu aki: hòmber bashí i hòmber na pia. Awe ke añadí unu mas: hòmber kèns. Pamela bo a hasi bon bon di bise:

“ Koñi groen koñi groen, Kòrsou ta yen mondi papa, ki k*ño bo tei buska groen”

El Consolador ta stroba defuntu

Nos tur sa ku un entiero semper ta algu doloroso. Ta e último oportunidat pa tuma despedida di bo ser kerí i p’esei mes bo ke pa tur kos kana na òrdu. Despues su sera kaha, ta un kaminda a keda pa bai: santana. No por ta asina ku na kaminda e waha di morto ta djèm paso gasolin a kaba. Ta kiko bo ke pa e famianan hasi? Sake fo’i ei den i hink’e den outo?  Ta nada mes no por bai bon mas riba e lugá aki? Asina aki si niun hende no ta haña gana di muri En fin. E video ta papia pa su mes.

 

 

Fundashon Bon Intenshon 1 – Ben Whiteman 0  

Segun nos promé minister ta falta di Fundashon Bon Intenshon ku Brionplein tabatin solamente 500 pa duna honor na nos bandera. Na sentro di bario Montanja kaminda a repartí karchi grátis pa presensia Juan Luis Guerra i Kassav tabatin kasi 5000 hende. E multitut aki a kanta himno mainta trempan pa despues sigui para den rei bunita pa haña nan karchi. Na Brionplein tabatin 500 i 160.000 a keda kas drumi òf nan a bai ku vònkòngsi.

FBI a reakshoná indikando ku pa e añanan benidero lo no parti niun karchi grátis mas. Esei ke men ku si pueblo ke mira show nan bai sinta den e sirko ku yama Polítika. Riba e video i potrètnan bo por haña un impreshon di e ambiente tantu na Brionplein komo sentro di bario Montanja.

Un danki speshal na Morgan Isenia i Yves The Punisher of God Cooper.

 

Hasimentu di negoshi ku karchi di fiesta

Den bida bo tin ku evitá di atendé ku dos tipo di hende: hende bashí i hende ku hamber. Niun di dos no ta di konfia i sigur no banda di bo plaka òf kuminda. Manera tur hende sa djasabra awor tin un bon fiesta. E kombinashon di banda ta unu ku masha dia hopi hende ta warda dje. Esaki mes a sòru ku den un tempu rèkert tur karchi a wòrdu bendé. Awor ku dia ta serka bo ta mira aki aya kon karchinan ta paresé na benta pa sumanan ridíkulo.

eager-for-more-money

Aparte di esaki nos a mira tambe ku ke kambia karchi pa entre otro:

  • Toyota Yaris 2016
  • Un chupa di vèt serka Dr. Milan Lopez (no hasi mané bo no sa ta ken)
  • Mitar aña di seguro all risk pa Kia Sportage
  • Un bùngalo di dos kamber den Piskadera Resort

Un lokura total.

Si bo no por bai fiesta mas plis bende e karchi na un preis normal. Nos sa ku ta mei mei di luna pero bo no por stens ku otro hende tei saka bu fo’i pèrtá

Nos ta deseá tur hende ku bai e dilnan ariba menshoná éksito.

 

Negoshi di bende kuminda tur na pupu di kachó

Atenshon: si bo stoma ta suak por fabor no sigui lesa ni wak e siguiente video. Ta trata aki di un negoshi ku ta keda riba Winstonchurchillweg. Trahamentu di pan i limpiamentu di rabu ta tuma lugá riba un flur tur na pupu di bestia. Drechi pa nos. Ta sera e lugá awe i pa mañan ya e ta yen yen di kliente ku ta sigui kumpra manera nada no a pasa. E kosnan aki lo stòp di pasa solamente si nos bisa ta basta.

Asina ei nos a presentá bu un Resúmen despues di basta tempu. Awe ta Djamièrdè.

Djamièrdè pa hopi di nos ta nifiká ku plaka a kuminsá skarsa i pa otro siman kaya lo ta basta ketu. En todo kaso. Nos ta despedí di bo pero tog rekordando bo ku maske:

Atrobe un partido polítiko nobo a nase, VDC ta bai investigá gerensia di Banko Sentral i despues di mas ku un aña ainda obispado no ke bisa dikon a kore ku pastor Saimon

 

T’aki mi ta BEBA

Hòmber mahos mester pela

Ántes hende hòmber tabata pela solamente pa un okashon speshal òf ora e muhé menasá di bai fo’i kas. Awendia tur kos a kambia. Hòmbernan ta super konsiente ku si bo no tin tipo anto sikiera sòru pa bo kabei ta na òrdu. Barberianan ta yen yen di djaluna pa djasabra i tin hasta un par ku ta habri riba djadumingu. Pa no papia mes di esnan “bo’i palu”. Muhénan ta bira masha deskonfiá ora ku “atrobe” bo sali pa bai barberia i ta puntra na bos haltu:

“ no ta poko dia ei ba pela?”.

Pelamentu ta parti di e hòmber su privasidat

Si, ta kiko bo a kere? Ora un hòmber sali kas djasabra mainta trempan ta dos kos e tin ku hasi sigur: pela i hiba su outo laba. E rutina aki ta yud’é rilèks su mente di pesadianan manera entre otro: koleganan chupadó, un òf mas èks rakataka ku ta bèl pidi sèn pa yu òf di pastor ku ta blo keda puntra e muhé ki dia e ta bini kuné pa sera konosí.

E ser femenino hopi bia no ta komprondé kon importante e rutina di tur djasabra aki ta. Tin di nan ku hasta ta riska di bisa ku nan tambe ke bai. Ta un manera di kontesta e pregunta aki so tin:

“Nooit van je lang zal ze leven”

Barberia na tur kanal i koló

Na Kòrsou tin mas tantu barberia ku restorant Chines. Ta parse manera tur hende ku logra kumpra un mashin di pela, outomátikamente ta haña e derechi di yama nan mes barbero. Naturalmente esaki ta sòru pa hopi desgrasia. Ta un horor pa mira hende sali for di barberia ku un pela mané ta bati nan a batié ku e mashin di pela den kabes. Otro nan ta drenta ku un frenta chikí i sali ku asina un pista di aterisahe (feitá skùin).

Algu típiko di tur barberia ta e barbero riba su mes. Bo tin por ehèmpel e barbero ketu, esun ku ta papia hopi sin bisa nada, esun ku yen muhé ta keda bin para kombersá kuné, e barbero ku ta hinter dia na su telefòn i tambe e barbero ku ke sa e por tur kos mihó: “Pin Peladó”. “Pin” mes ta pela pero tambe e ta mètslá, rèper, karpinté, polis, dentista, hungadó di futbòl profeshonal, miembro di Afpakteam i kòki.

Den barberia semper ta reina un esfera di alegria. Hopi hòmber riba otro gritando, muzik duru, riba televishon un dvd di “brand” pasando pelíkula ku hopi bashamentu di bala i semper tin “ganga”. Ganga riba entre otro paña, piesa di outo, yu di kachó, mata di mariwana i oloshi di imitashon.

BAR.BER: un airu nobo i super refreskante

Den bida ta dos kos bo mester evitá mas tantu posibel di kambia: bo muhé i bo barbero. Si dado kaso bo barbero su kalidat di servisio bai atras, e kai será òf dal abou muri no tin moda di hasi. Siman pasá kuriosidat a pone nos kana yega te den porta di: BAR.BER

BAR.BER ta para pa un “concept store” estilo 3-den-1: Vintage Barbershop, Men’s clothing i Coffee shop.

Pietermaai District ta konosí pa su manera di presentá lokalidatnan manera bar, restorant etc. di un forma úniko i moderno. Awor ku BAR.BER tambe tei bo ta sinti manera ta 5 pastia di Fisherman’s Friend tin den bo boka: Refreskante na un nivel super haltu.

Esaki ta wòrdu konfirmá ku e promé paso ku bo dal den e lokalidat. E diseñadó interior meresé e título di Ridder Grootkruis in de Orde van Oranje Nassau i e barberonan mes kada unu tin derechi di haña un kaya na nan nòmber.

Un eksperensia úniko ta loke bo ta pasa den na momentu di sinta den e stul di pela. Miéntras ku e mashin di pela ta karisia bo kabes, e aroma di un bon kòfi ta pasa bou di bo nanishi. Sofa i stulnan ta sòru pa tur hende ku mester warda riba nan turno hasi esaki na un forma kómodo. Tur esaki kompaña pa tononan di Jazz, Blues, New Age Soul, Real Hip Hop i Funk resultando den un orgasmo musikal.

Tambe BAR.BER tin un kolekshon chikí di paña i asesorionan (di kabei i barba tambe) pa hende hòmber. Nada ku ta bin na bòshi no por ta bon tòg ?

En todo kaso siguiente bia ku bo muhé puntra si ta pela bo ta bai pela atrobe bo ta kontest’é:

“No dushi, ta mi spiritu mi ta bai enrikesé!”

Deze slideshow heeft JavaScript nodig.

Mi no sa bai fiesta

Ta un frase ku regularmente bo por skucha for di hopi hende. E motibu di esaki por ta varia di: “ma bira gordo”, “mi no tin hende pa wak yu”, “DUO tin mi hartá” te ku “mi Audi mester di tayo nobo” i “tur fiesta ta mes kos”.

Den e tempu ayá

Promé ku e mundu di Facebook, Instagram, Snapchat i otro medionan pa kibra bida di hende tabata eksistí, baimentu di fiesta tabata pa relahá i pasa un ratu ameno den kompania di konosínan i otro amistat. Durante di fiesta tur hende tabata baila i gosa. No ta tin tempu pa wak ken a bin ku hòmber/muhé di hende, kua sapatu nan a bisti i kuantu kos di bebe a wòrdu kumprá.

E kosnan di mas prinsipal tabata e karchi di fiesta i un tiki sèn pa bo gasta. Despues bo bida ta sigui normal. Debenan di luna ta sera pagá. E Arabir ku a bende bo e set di sala, e Haitiano ku a bende bo e hòmber chikitu di palu i hasta e Venezolano ku a bende bo “dulce de leche” ta haña su plaka na tempu. Parehanan ta keda bon ku otro. Niun di dos no ta buska pleitu pa por haña chèns di bai e siguiente fiesta nan so òf ku “amigu/a”.

Awendia fiesta a bira kompetensia

Puntra ken ku bo ke. Mi tin sigur ku nan lo duna bo e mes un kontesta. Ta hinter un pesadia bo ta pasa aden preparando pa un fiesta. Mester bestèl paña for di Hulanda, Merka òf tela di “ruwe zijde” for di Tailandia pa kose shimis i flus. No lubidá riba e yarda di “human hair” òf un sita pa laga traha un bon peluka. “Waistrainer”, krema pa kita “klaibobo” i santu ku semènt pa drecha dak di matris ta kaba na tur establesimentu for di trempan.

Aparte di tur e kosnan ariba menshoná ainda falta e bendita karchi. Aki un mundu nobo ta habri. Aparentemente a bira na moda pa parti fiestanan den diferente sekshon manera; chusma, general, basta bon pará, sèn di mama a kumpra karchi, bo tata ta minister i afpakteam ata mi aki. Mas plaka bo gasta mas grandi e lus ku tin na bo mesa ta sende. Si akaso bo pidi un bòter di bibida, e muzik ta ta wòrdu bahá i den mikrofon ta grita ken a kumpr’é i kuantu e la kosta.  Bo por imaginá bu e mes un situashon den un supermerkado? Ata bo a pasa piki un bòter di ketjap manis den rèki 5 i tur hende a sa bo drechi.

E palabra Ambiente a kai pèrdè den abismo fo’i hopi tempu pasá. Si fiesta ta kuminsá 11 or, 2 or di mardugá e promé 50 hendenan ta yega. Un ora ku hasta zumbi a subi kama sosegá. Entre 2or pa 5 minüt promé ku 4 or masha tiki hende ta baila. Ta durante e delaster 2 kantikanan dansflur ta yena pa bo despues bo haña tur hende pará na trùk di pan.

Ta falta di ken?

Promotornan sin generator, e kayanan di Minister Camelia-Römer ku falta liña, Nicole Lake ku a bolbe hui òf sindikato PWFC ku tin talento den kobamentu di mama. E kontesta ta simpel. Ta nos mes falta. Nos a laga tur loke ta importante kai pa hasi hasta baimentu di fiesta algu pa kompetí den dje. En bes di un anochi yen di goso bo ta haña hendenan kara tur fèrdrit òf rabiá den fiesta ta wak otro. Esun tin miedu di baila pa su kosé nan di operashon no rementá miéntras e otro su pia ta na kandela di bisti Louboutin un sais mas chikí ku su pia.

Kiko mester hasi pa kos drecha?

Ban bek na loke ta importante. Ambiente, ambiente i mas ambiente mester bini bèk na promé lugá. Kosnan diario di bida ya ta sòru pa hopi strès i un fiesta mester aliviá nos di esaki maske ta pa un ratu. Tin un dicho ta bisa; “papia ta fásil pero hasi te kos”. P’esei mes Oompie Stroopie huntu ku Roderick Volk ta invitá bo na JetSet: un fiesta ku un solo meta: forma un gran ambiente!

Attention all JetSetters!

When attending a party the last thing you want to worry about is whether or not you’re standing in the right “section”. On this night there will be only One Section, “All People”. After all we share the same objective: Partying all night long.

We will give you the opportunity to be part of this unforgettable “Ambiente” surrounded by friends and colleagues.
We go out to enjoy great music, interact with friends and take our minds off of the stressful days at work. Many parties nowadays lack these basic possibilities so we decided to take action.

JETSET (003)

For tickets call:
Eli Boeldak: 6947711
Roderick Volk: 5268224
Quinton Stroop: 5222442
Roushaira Alexander: 5224926
Zunette Lovesitall: 5290090
Raynni Jourdain: 5280080
Shanti Rafael: 5125069
Tyson Hill: 5212240
Giannina Balentien: 5200210
Jadira Laaf: 5127968
Dupal Persaud: 564 5155